+2 மாணவர்களே உங்களில் பலர் பொறியியல் துறையில் பட்டப்படிப்பிற்கு விண்ணப்பித்திருப்பீர். உங்களுக்காக சில தகவல்கள்
பொறியியல்
துறையில் பட்டம் பெற விரும்பும் நீங்கள் கணிதப்பாடத்தில் அதிக
விருப்பமுள்ளவராக இருக்க வேண்டும். கணிதப்பாடத்தில் உங்கள் மதிப்பெண்
குறைந்திருக்கலாம். அதற்காக உங்களுக்கு கணிதப்பாடத்தில் ஆர்வமில்லை என்று
ஆகிவிடாது.
பொறியியல் படிப்பு என்பது பயன்பாட்டு கணிதம்
மற்றும் பயன்பாட்டு இயற்பியல் (Applied Mathematics & Applied Physics)
ஆகிய இரண்டும் சேர்ந்த ஓரு கலவை. ஒவ்வொரு பொறியியல் துறை சார்ந்து
இவற்றின் விகிதம் மாறுபடலாம். ஆனால் இயற்பியலும் கணிதமும் சேர்ந்ததுதான்
பொறியியல்.
அறிவியலின் மொழி 'கணிதம்'. நான்கு
பக்கத்திற்கு விவரித்து கூறவேண்டிய ஒரு இயற்பியல் கோட்பாட்டை ஒற்றை வரி
கணிதச் சமன்பாட்டில் அடக்கிவிடலாம். வகை நுண்கணிதம் , தொகை நுண்கணிதம்,
வடிவியல் , முக்கோணவியல் என கணிதத்தின் அனைத்து உட்பிரிவுகளின் துணைகொண்டே
அறிவியலை முழுமையாக விளக்க முடியும்.
பொறியியலின்
அடிப்படை கூறுகளைத் திறம்பட கற்றவர்களுக்கே சிறப்பான வேலைவாய்ப்பு
காத்திருக்கிறது. அடிப்படைக் கூறுகளைக் கற்பதற்கு 'தர்க்கரீதியாக
சிந்திக்கும் ஆற்றல்' (Logical Thinking) பகுத்தாயும் திறன் (Critical
Reasoning) ஆகியவை அவசியம். கணிதத்தை ஈடுபாட்டோடும் ஆர்வத்துடனும் கற்பவர்களுக்கு இத்திறன் இயல்பாகவே அமையும்.
உதாரணத்திற்கு
கணிதப் பாடத்தில் கொடுக்கப்பட்ட கணக்குகளுக்கு நாம் தீர்வு காண, நமக்கு
தரப்பட்ட தரவுகளை முழுமையாக ஆராய்ந்து, பல வழிமுறைகளில் இருப்பினும் எந்த
வழிமுறை நமக்கு கொடுக்கப்பட்ட தரவுகளுக்கு ஏற்ப பயன்படும் என அலசி
(Analysis & Reasoning), அதனை ஒவ்வொரு படியாக பயன்படுத்தி விடையினை
எட்டுவோம்.
அதே நடைமுறைதான் தர்க்கரீதியாக
தொழில்நுட்பத்தை கற்பதற்கும் பொருந்தும். பொறியியல் தீர்வுகளை (Solutions
to Engineering Problems) அடைய பல உத்திகளின் சாதக பாதகங்களை ஆராய்ந்து ,
அவற்றுள் சிறப்பான உத்தி கையாளப்படும்.
பொறியியல் படிப்பிற்கான கட் ஆப் மதிப்பெண்ணில் கணிதத்திற்கு 50% பங்கு அளிக்கப்பட்டதற்கும் அதுவே காரணம். மின்னணு பொறியியல், கணிணி அறிவியல் உள்ளிட்ட பொறியியல் துறைகள் 60% கணிதத்தை அடிப்படையாகக் கொண்டவை.
எனவே
கணிதத் தேர்வில் பெற்ற மதிப்பெண்களைக் காட்டிலும் கணிதப் பாடத்தின் மேல்
நீங்கள் கொண்ட ஆர்வமும் அதன் கோட்பாடுகளை கற்க நீங்கள் எடுக்கும்
முயற்சியுமே பொறியியல் பாடங்களை உள்ளார்ந்து புரிந்து படித்து வெற்றி பெற
உதவும்
மா.ராஜாமாடசாமி
உதவி பேராசிரியர் /மின்னணுவியல்
அரசினர் பொறியியற் கல்லூரி போடிநாயக்கனூர்
Comments